2012年攞完法甲冠军嘅蒙彼利埃，近年表现每况愈下，今季开咧两战全败之馀更1球都入唔到，今晚主场面对亿万大军巴黎圣日耳门（PSG），相信都係等做「炮灰」，让球主客和PSG让一球，阿谦会直取让球客胜。

（TVB 302周六凌晨2时30分直播）

PSG近期录得4连胜状态甚弗，球队虽有伊巴谦莫域、迪马利亚同马昆奴斯哥利亚因伤唔踢得，但仍能喺开咧两场联赛攻入3球且1球不失，全赖顶替伊巴嘅卡云尼有货交，配合埋马高华拉堤、马度迪及卢卡斯洛迪古斯攻坚，令球队依然保持强大火力。而且PSG防线表现稳健，已经连续4场赛事都保住清白之身，横睇掂睇都係超晒班。

蒙彼利埃喺2012年力压PSG同里尔捧走当届法甲冠军，但同好多中型班一样，球队根本唔够料踢欧联，结果翌季令班波元气大伤，之后几季都返唔到前列位置。今夏佢哋有上季射入11球嘅首席射手巴里奥斯离队，只靠莫尼亚同苏利文尼卡马拉攻坚，难怪开季首两场联赛输晒之馀仲1球都入唔到，攻不锐守不稳对住如狼似虎嘅PSG，肯定凶多吉少，让球客胜值得支持。